चम्पा अउ चमेली
लेखिका - प्रिया देवांगन प्रियू
एक गाँव में दू झन बहिनी रिहिसे , चम्पा अउ एक के नाम चमेली. चम्पा के दाई सौतेली रिहिसे. चम्पा बहुत घमंडी रिहिसे. चमेली के स्वभाव बहुत शांत रिहिसे. चमेली के दाई चमेली ला बिल्कुल भी पसन्द नई करत रिहिसे. चम्पा ला बहुत प्यार करे. चम्पा के दाई चम्पा ला कोई काम नई करवाये. सब काम ला चमेली हा करे.
चमेली रोज गॉव से बाहिर पानी भरे ला जाय. एक दिन के बात हरे, चमेली हा पानी भर के आवत रिहिसे, ता रस्ता मा एक डोकरी मिलिसे. डोकरी कहिस बेटी मोला पानी देदे, ता चमेली हा ओला पानी पिलाइसे. डोकरी बोली से भगवान तोर भला करे बेटी. तोर तो पानी खतम होंगे अब फिर से जाय ला परही. ता चमेली बोलिसे - कोई बात नहीं में चले जाहु. चमेली फिर से तालाब गिस, मटका में पानी भरिसे, तहान एक सुंदर से परी दीखीसे. चमेली देखते रहिगे. परी बोलिसे - रास्ता में जे डोकरी ला पानी पिलाहस ते महि हरो. मेहा जल परी हरो इही तालाब में रहिथो. तोला रोज देखतो, तेहा रोज पानी भरे ला आथस. में तोर काम से बहुत प्रसन्न हो तोला आशिर्वाद देवत हो. तोर घर पूरा सोना से भर जाही. जइसे-जइसे बोलत जाबे तोर मुहु ले सोना निकलत जाही. चमेली खुश होके पानी के मटका ला धर के घर कोती गीस.
घर मे गीस त चमेली के माँ हा अब्बड़ गारी दिसे. पुछिसे कहा रेहेस अतका बेरा ले? फेर चमेली जइसे-जइसे अपन घटना ला बतावत जात रिहीसे वइसे-वइसे ओकर मुहु ले सोना चांदी अउ हीरा गिरत जात रिहिसे. येला देख के ओकर दाई खुश होंगे. अउ चमेली ला पुछिसे की येहा कइसे होइसे बेटी. चमेली बहुत खुश होके बताये ला लागिस की पहली बार मोला बेटी बोलिसे. ओकर बाद चम्पा ला आवाज लगाइस अउ बोलिसे की तहु ह पानी भरे ला जा अउ वो डोकरी के इंतजार करबे अउ पानी पियाबे.
चम्पा ह पानी भरे ला गिस अउ पानी भर के पेड़ के छाँव मे बईठे रिहिसे. थोकिन देर बाद एक बकरी चरवाहा आइस. अउ बोलिसे बेटी मोर बकरी ला प्यास लगत हे थोड़ा पानी देबे का. चम्पा बहुत घमंडी रिहिसे. बोलिसे - में कोनो जानवर बर पानी नई भरे हो. जेला प्यास लगत हे ओहा तालाब में जा के पी सकत हे. ओकर बाद बकरी वाला ह परी बनगे अउ बोलिसे की चम्पा तेहा बहुत घमंडी हरस. मेहा श्राप देवत हो कि जइसे तेहा मुहु खोलबे तोर मुहु ले पथरा गिरही.
चम्पा रोवत-रोवत घर गिस. दाई हा चम्पा ला पुछिसे का होंगे बेटी तोला काबर रोवत हस. चम्पा जइसे मुहु खोलिसे वइसे ओकर मुहु ले पथरा गिरत रिहिसे.रोवत -रोवत बताइस सबो कहानी ला. थोकिन देर बाद जल परी आइस अउ बताइस की चमेली ला मेहा आशिर्वाद देहो अउ चम्पा ला श्राप. चम्पा बहुत घमंडी हरे अउ ओकर दाई हा चमेली ला बहुत परेशान करथे. परी हा बताइस की चमेली बहुत अच्छा हावय. ओकर बाद चम्पा अउ ओकर दाई चमेली से अच्छा से बात करे ला धर लिसे. अउ हँसी खुशी मिलके रहे ला लागिस.